ຂ່າວ ຫ້ອງວ່າການແຂວງ

ກອງປະຊຸມ ສະຫລຸບການຈັດຕັ້ງປະຕິບັດວຽກງານ ຂອງ ຫ້ອງວ່າການແຂວງອຸດົມໄຊ ປະຈຳປີ 2025 ໄດ້ຈັດຂຶ້ນໃນວັນທີ 26 - 27 ກຸມພາ 2026 ນີ້ ທີ່ ຫ້ອງປະຊຸມຫ້ອງວ່າການແຂວງ ພາຍໃຕ້ການເປັນປະທານຂອງ ທ່ານ ພິໄລທອງ ຈິດມະນີ ກຳມະການສຳຮອງສູນກາງພັກ, ຫົວຫນ້າຫ້ອງວ່າການແຂວງ. ເປັນກຽດເຂົ້າຮ່ວມມີ ທ່ານ ປອ ວົງສະຫວັນ ໄຊຍະວົງ ຮອງເລຂາພັກແຂວງ, ປະທານຄະນະກຳມະການປົກຄອງແຂວງ. ມີ ຄະນະພະແນກການ, ອົງການອ້ອມຂ້າງ, ສອງກອງບັນຊາການ ປກຊ-ປກສ, ຫ້ອງວ່າການ 7 ເມືອງ ພ້ອມດ້ວຍພະນັກງານວິຊາການພາຍໃນຫ້ອງວ່າການແຂວງ ເຂົ້າຮ່ວມ.

ກອງປະຊຸມໄດ້ລົງເລິກ ຕີລາຄາຄືນການຈັດຕັ້ງປະຕິບັດ ວຽກງານ ຂອງ ຫ້ອງວ່າການແຂວງ ໃນໄລຍະ 1 ປີ ຜ່ານມາ ແລະ ກຳນົດທິດທາງແຜນການ ວຽກງານຈຸດສຸມ ປີ 2026 ຕິດພັນກັບການ ຜັນຂະຫຍາຍແຜນພັດທະນາວຽກງານຂອງຫ້ອງວ່າການ 5 ປີ (2026-2030). ເຊິ່ງຕະຫຼອດໄລຍະ 1 ປີ ຜ່ານມາ ຫ້ອງວ່າການແຂວງ ໄດ້ສຸມໃສ່ເຄື່ອນໄຫວວຽກງານຕາມພາລະບົດບາດຂອງຕົນ ໃນການເປັນເສນາທິການ ຕາມ 3 ພາລະບົດບາດ ຕິດພັນກັບການປະກອບສ່ວນເຂົ້າໃນການຈັດຕັ້ງປະຕິບັດ ບັນດານິຕິກຳ ແກ້ໄຂບັນຫາເຄັ່ງຮ້ອນຕ່າງໆ ຂອງຂັ້ນເທິງ ຢ່າງຕັ້ງໜ້າ ໃນທ່າມກາງສະພາບແວດລ້ອມທີ່ແຂວງ ຍັງສືບຕໍ່ປະເຊີນກັບຄວາມຫຍຸ້ງຍາກທາງດ້ານເສດຖະກິດ-ການເງິນ, ງົບປະມານຈຳກັດ ແຕ່ປະລິມານວຽກພັດຫຼາຍ ເນື່ອງຈາກເປັນປີມ້ວນທ້າຍສະໄໝ ບວກກັບ ບັນຫາປະກົດການຫຍໍ້ທໍ້ອື່ນໆທີ່ເກີດຂຶ້ນໃນສັງຄົມ ເຊິ່ງເປັນສິ່ງທ້າຍທາຍ ແລະ ກະທົບໂດຍກົງຕໍ່ການຈັດຕັ້ງເຄື່ອນໄຫວວຽກງານຂອງຫ້ອງວ່າການ. ແຕ່ຍ້ອນການນຳພາຢ່າງໃກ້ຊິດຕິດແທດ ຂອງ ຄະນະປະຈຳພັກແຂວງ, ຄະນະກຳມະການປົກຄອງແຂວງ ບວກໃສ່ຄວາມຮັບຜິດຊອບການເມືອງຂອງ ຄະນະພັກ-ຄະນະນຳ ຫ້ອງວ່າການແຂວງ, ຄວາມເສຍສະຫຼະ, ຄວາມຈູບຈ້າວຫ້າວຫັນ ແລະ ຄວາມສາມັກຄີເປັນປຶກແຜ່ນແໜ້ນໜາ ຂອງ ພະນັກງານຫ້ອງວ່າການ ສາມາດເຮັດໃຫ້ວຽກງານເສນາທິການໄດ້ຮັບການປັບປຸງເຂັ້ມແຂງຂຶ້ນເທື່ອລະກ້າວ ອັນພົ້ນເດັ່ນ ການເປັນເສນາທິການທາງດ້ານເນື້ອໃນ ແມ່ນເຮັດໄດ້ດີຂຶ້ນຢ່າງຕໍ່ເນື່ອງ ເປັນຕົ້ນ ການກະກຽມຈັດກອງປະຊຸມຕ່າງໆ ເຮັດໄດ້ຢ່າງທັນການ ແລະ ຮັບປະກັນ ເນື້ອໃນດີ; ການເປັນເສນາທິການໃນການປະສານງານ, ບໍລິຫານ-ຮັບໃຊ້ ເຮັດຫຼ້ອນໜ້າທີ່ ສ້າງຄວາມເພິ່ງພໍໃຈໃຫ້ແຂກລະດັບຕ່າງໆດີພໍສົມຄວນ; ລະບົບກົງຈັກການຈັດຕັ້ງໄດ້ຮັບການປັບປຸງໃໝ່ ມີຄວາມກະທັດຮັດ ສອດຄ່ອງກັບນິຕິກຳຂອງຂັ້ນເທິງ ແລະ ສະພາບຕົວຈິງຂອງແຂວງ ແລະ ລະບົບຄຸ້ມຄອງເອກະສານກໍໄດ້ລິເລີ່ມຫັນເປັນທັນສະໄໝຂຶ້ນເທື່ອລະກ້າວ. ກອງປະຊຸມ ຍັງໄດ້ຍົກເອົາບັນຫາທີ່ຍັງຄົງຄ້າງ ເພື່ອມາຊອກຫາສາເຫດ ແລະ ກໍານົດທິດທາງ ປັບປຸງ ແກ້ໄຂ ໃຫ້ດີຂຶ້ນໃນຕໍ່ໜ້າ ໂດຍສະເພາະແມ່ນ ບັນດາກົນໄກການຈັດຕັ້ງປະຕິບັດວຽກງານເສນາທິການ ທີ່ຕິດພັນກັບບັນດາຂະແໜງການອ້ອມຂ້າງແຂວງ. ກອງປະຊຸມ ຍັງໄດ້ຮຽກຮ້ອງໃຫ້ທຸກພາກສ່ວນທີ່ເຂົ້າຮ່ວມຍົກສູງຄວາມຮັບຜິດຊອບທາງດ້ານການເມືອງ ໃນການຄົ້ນຄວ້າລົງເລິກ ແລະ ປະກອບຄໍາຄິດ ຄໍາເຫັນ ຢ່າງກົງໄປກົງມາ ເພື່ອຊອກໃຫ້ເຫັນບັນຫາ, ສາເຫດ ແລະ ກໍານົດທິດທາງໃນການແກ້ໄຂໃຫ້ຖືກຕ້ອງ ແນໃສ່ເຮັດໃຫ້ການເຄື່ອນໄຫວວຽກງານເສນາທິການ ຂອງ ຫ້ອງວ່າການ ມີປະສິດທິຜົນດີຂຶ້ນກ່ວາເກົ່າ ໂດຍສະເພາະແມ່ນ ຮັບປະກັນໃຫ້ປະຕິບັດໄດ້ ຕາມຄຳຂວັນ 3 ດີ 4 ໃຫ້ ທີ່ໄດ້ວາງໄວ້ໃຫ້ປະກົດຜົນເປັນຈິ່ງ.

ໃນວັນທີ 22 ມັງກອນ 2026, ທີ່ຫ້ອງປະຊຸມຫ້ອງວ່າການປົກຄອງແຂວງ, ໄດ້ຈັດກອງປະຊຸມເຊື່ອມຊຶມເອກະສານສຳຄັນຂອງພັກ, ກົດໝາຍຂອງລັດ ແລະ ເອກະສານມູນເຊື້ອວັນສຳຄັນຕ່າງໆຂອງຊາດ. ກອງປະຊຸມຄັ້ງນີ້ ໃຫ້ກຽດເປັນປະທານໂດຍ ທ່ານ ພິໄລທອງ ຈິດມະນີ, ກຳມະການສຳຮອງສູນກາງພັກ, ຫົວໜ້າຫ້ອງວ່າການແຂວງ; ມີບັນດາຄະນະຫ້ອງວ່າການ, ພະແນກການ, ພ້ອມດ້ວຍພະນັກງານ-ລັດຖະກອນພາຍໃນຫ້ອງວ່າການເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສ້າງຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງໃຫ້ແກ່ສະມາຊິກພັກ, ພະນັກງານ-ລັດຖະກອນ ຕໍ່ກັບແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ໂດຍສະເພາະແມ່ນການຫັນເອົາເນື້ອໃນຈິດໃຈຂອງສູນກາງ ລົງສູ່ການຈັດຕັ້ງປະຕິບັດຕົວຈິງຢູ່ທ້ອງຖິ່ນໃຫ້ມີປະສິດທິຜົນ.

ໃນກອງປະຊຸມ, ທ່ານປະທານໄດ້ໃຫ້ກຽດເຜີຍແຜ່ ແລະ ເຊື່ອມຊຶມບັນດາເອກະສານທີ່ສຳຄັນ ດັ່ງນີ້:

ມະຕິກົມການເມືອງສູນກາງພັກ ສະບັບເລກທີ 26/ກມສພ (ລົງວັນທີ 12 ກັນຍາ 2025): ວ່າດ້ວຍການນໍາພາ-ຊີ້ນໍາ ຂອງຄະນະພັກທຸກຂັ້ນ ຕໍ່ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ V ທີ່ຈະມາເຖິງນີ້. ເຊິ່ງເນັ້ນໜັກໃຫ້ຄະນະພັກທຸກຂັ້ນຖືເອົາວຽກງານການເລືອກຕັ້ງເປັນບັ້ນການເມືອງທີ່ສຳຄັນທີ່ສຸດ ເພື່ອສ້າງຄວາມເຂັ້ມແຂງໃຫ້ແກ່ອຳນາດການປົກຄອງລັດ.

ການເພີ່ມທະວີການນໍາພາແນວຄິດ ແລະ ເສີມຂະຫຍາຍສິດປະຊາທິປະໄຕ: ເພື່ອປຸກລະດົມໃຫ້ພະນັກງານ ແລະ ປະຊາຊົນມີສະຕິຕື່ນຕົວໃນການໄປໃຊ້ສິດເລືອກຕັ້ງຢ່າງເປັນຂະບວນຟົດຟື້ນ ແລະ ເລືອກໄດ້ບຸກຄະລາກອນທີ່ມີມາດຕະຖານ, ເງື່ອນໄຂຄົບຖ້ວນ ເຂົ້າໃນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ.

ກົດໝາຍວ່າດ້ວຍການເລືອກຕັ້ງ ສສຊ ແລະ ສສຂ: ເພື່ອໃຫ້ຜູ້ເຂົ້າຮ່ວມໄດ້ກຳແໜ້ນຫຼັກການ, ຂັ້ນຕອນ ແລະ ລະບຽບການຕ່າງໆ ໃນການປ່ອນບັດເລືອກຕັ້ງໃຫ້ຖືກຕ້ອງຕາມກົດໝາຍ.

ແຜນດໍາເນີນງານຂອງຄະນະກຳມະການເລືອກຕັ້ງຂັ້ນແຂວງ (ສະບັບເລກທີ 011/ຄລຂ): ເພື່ອຜັນຂະຫຍາຍແຜນວຽກລະອຽດ, ການແບ່ງຄວາມຮັບຜິດຊອບ ແລະ ກຳນົດເວລາໃນການກຽມຄວາມພ້ອມດ້ານຕ່າງໆ ພາຍໃນແຂວງໃຫ້ມີຄວາມເປັນເອກະພາບ.

ນອກຈາກວຽກງານການເລືອກຕັ້ງແລ້ວ, ກອງປະຊຸມຍັງໄດ້ຫວນຄືນມູນເຊື້ອປະຫວັດສາດທີ່ສຳຄັນ ເພື່ອສຶກສາອົບຮົມດ້ານການເມືອງ-ແນວຄິດ ເປັນຕົ້ນແມ່ນ:

ວັນສ້າງຕັ້ງກອງທັບປະຊາຊົນລາວ ຄົບຮອບ 77 ປີ: ເພື່ອຈົດຈຳບຸນຄຸນ ແລະ ຜົນງານອັນລ້ຳຄ່າຂອງກອງທັບ ທີ່ໄດ້ເສຍສະຫຼະເລືອດເນື້ອເພື່ອເອກະລາດ ແລະ ຄວາມເປັນເອກະລາດຂອງຊາດ.

ວັນສ້າງຕັ້ງສະຫະພັນກຳມະບານລາວ ຄົບຮອບ 70 ປີ: ເພື່ອຍົກສູງບົດບາດຂອງຊົນຊັ້ນກຳມະກອນ ແລະ ຜູ້ອອກແຮງງານລາວ ໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ໃນຕອນທ້າຍຂອງກອງປະຊຸມ, ທ່ານ ພິໄລທອງ ຈິດມະນີ ໄດ້ມີຄຳເຫັນຊີ້ນຳ ແລະ ສັງລວມເນື້ອໃນສຳຄັນ ໂດຍທ່ານໄດ້ເນັ້ນໜັກໃຫ້ພະນັກງານທຸກສະຫາຍ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ເອົາໃຈໃສ່ໂຄສະນາເຜີຍແຜ່ຂໍ້ມູນຂ່າວສານການເລືອກຕັ້ງໃຫ້ກວ້າງຂວາງ ແລະ ກຽມພ້ອມທຸກດ້ານເພື່ອເຮັດໃຫ້ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ທີ່ກຳລັງຈະມາເຖິງນີ້ ດຳເນີນໄປດ້ວຍຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ໄດ້ຮັບຜົນສຳເລັດຕາມຄາດໝາຍທີ່ວາງໄວ້.